Indiensstelling 05

	LW. Hierdie inligting is deel van Volkshulp 2000 se argief van werksaamhede gedurende die tydperk 1 Maart 2004 tot 28 Februarie 2005

	Nuutste Jaarverslag

Indiensstellings 2005

Indiensstellings

Die pogings om die toenemende verarming van ons volksgenote aan te spreek, het by herhaling weer beklemtoon dat geld alleen nooit die probleem sal kan oplos nie. Die bekampingsantwoord lê elders: In werk. Vandaar dat Volkshulp 2000 se hoofdoel dan ook is om werk te skep en mense in diens te plaas sodat hulle self voedsel op die tafel kan plaas.

Volkshulp 2000 beskik oor ‘n indiensstellingskomponent wat ten doel het om te verseker dat aansoekers om werk so gou moontlik met werkgewers in kontak geplaas kan word - en visa-versa. Met die min personeel tot beskikking om hierdie omvattende taak te verrig, word nogtans groot suksesse behaal. Weekliks word gegewens oor poste wat beskikbaar is, en persone wat werk soek, oor Radio Pretoria uitgesaai (volg skakel na Program Skedule). Na so ‘n uitsending moet daar maar bontgestaan word om al die navrae te beantwoord. Dit moet beklemtoon word dat hierdie diens heeltemal gratis is en kan gedagte moontlik daaraan gegee word om voortaan ‘n dienstarief te hef. Die swaard oor die kop bly natuurlik dat belasting en BTW betaalbaar sal wees sodra ‘n inkomste op hierdie wyse verkry word.

Verdere verbetering in hierdie diens kan moontlik bewerkstellig word deurdat daar met ander instansies en persone wat ook reeds oor naastenby soortgelyke databasisse beskik, in verbinding getree en samewerkingsooreenkomste ondersoek word. Enkele sodanige moontlikhede is reeds onder die loep geneem.

Daar is gedurende die afgelope jaar R464 224 aan werkskepping en die indiensstelling van persone spandeer, terwyl 650 persone vir betrekkings na werkgewers verwys is. Die terugvoering oor suksesvolle plasings is egter nie so goed nie. Mense laat na om ons in kennis te stel en die personeel by ons ontbreek om opvolgaksies te onderneem.

Volkshulp 2000 hoor baie graag van persone, besighede of organisasies wat beskikbare poste het. Werkgewers word dringend versoek om van hul beskikbare poste direk aan Volkshulp 2000 te stuur. Asseblief werklike poste en nie skemas waarby inbetalings eers nodig is, voordat persone 'n inkomste kan verdien nie.
Beide werkgewers en werksoekers kan ook gerus gebruik maak van die GRATIS Internet advertensie-diens wat by die ADSA webwerf te kry is. Hoewel daar sekere voorwaardes is waarvolgens die ADSA webwerf opereer, is daar geen kostes of verborge kostes aan verbonde vir privaat persone nie. Die ADSA webwerf probeer die Volkshulp 2000 kliënte met die nodige respek hanteer.