Komitees 05

	LW. Hierdie inligting is deel van Volkshulp 2000 se argief van werksaamhede gedurende die tydperk 1 Maart 2004 tot 28 Februarie 2005

	Nuutste Jaarverslag


	Komitees 2005


		Volkshulpkomitees Moontlik was die oorspronklike gedagte om Volkshulpkomitees dwarsoor die land te vestig, dalk te optimisties. Dit word gesê, omdat die praktyk bewys het dat sulke Komitees nie sommer goedsmoeds gestig moet word nie. Daar was op ‘n stadium 26 Volkshulpkomitees funksionerend dwarsoor die land. Vandag is daar slegs vyf van hulle oor.
	Bygesê moet word dat daardie vyf voorwaar staatmakers van formaat is. Een van die belangrikste redes vir die mislukking van hierdie metodiek is dat die Hoofkantoor van Volkshulp 2000 nie behoorlik op hoogte van gebeure en werksaamhede gehou word nie. Hoe anders kan effektief rekenskap aan donateurs gegee word indien rekenpligtigheid nie vasgepen word nie? Dit geld ook met die doen van verantwoording aan ouditeure. Een van Volkshulp 2000 se belangrikste beginsels is juis dat behoorlike en effektiewe kontrolemaatreëls in plek is en dat rekenskap van alles in detail te enige tyd gedoen moet kan word. Verder, dat rekenkundige boekhouding beskikbaar moet wees vir enige bydraer se insae. Daar is nie juis veel ander besighede (indien enige) wat bereid is om DIT te doen nie! ‘n Verdere werklikheid is dat die welsynsomgewing waar daar hoofsaaklik met geskenkte items van die publiek gewerk word, hom maklik leen tot misbruik, wanaanwending en dan ook, selfverryking. Hierdie is aspekte waarop ons deurgaans bedag moet wees. Hiper-eerlikheid is een van die belangrikste kwalifikasies vir diegene wat enigsins by hierdie welsynsaktiwiteite betrokke wil wees. Maar, ons weet gelukkig verseker dat daar nog vele eerbare volksgenote daar buite is wat met ‘n bepaalde omgee-ingesteldheid geseën is, wat graag vir Volkshulp 2000 wil help sodat ons oraloor weer effektiewe Volkshulpkomitees gestig kan kry. Ook in hierdie geval sal Kerke en hul gemeentes genader word om te verneem of hulle nie nouer met Volkshulp 2000 wil saamwerk nie. Vergelyk ook Verarming.