| |
|
Drie jaar gelede is aansoek gedoen om vrystelling van belasting by
die SAID. 'n Donateur kan bv. 'n persentasie vrystelling op sy/haar
belastingpligtige bedrag verkry, indien 'n donasie aan 'n instansie wat
ingevolge Artikel 18a geregistreer is. Navrae van ons kant het die
gevolg gehad dat die SAID Volkshulp 2000 geregistreer het vir die
betaling van belasting. Ons argument is dat ons eenvoudig maar net 'n
geskenkte item, wat nie dadelik gratis aan 'n behoeftige persoon gegee
kan word nie, wil omskep in 'n ander kommoditeit (geld), waarmee ander
projekte dan gefinansier kan word, was nie suksesvol nie. Mens kan
immers nie 'n sak klere aan iemand gee om te eet nie. Daar kan ook nie bakstene
gekoop word met 'n geskenkte tafel nie, ten minste, nie maklik nie.
Hierdie situasie het meegebring dat ons verskeie kenners
(rekenmeester, ouditeur, regskenners, ander betroubare finansiële
adviseurs en konsultante) betrek het om na oplossings te help soek. Feit
was dat 'n "swaard" in die vorm van 'n belastingpligtigheid van ‘n baie
groot bedrag oor Volkshulp 2000 se kop hang. Oor 'n lang tyd (bykans
twee jaar) is samespreking op samespreking gevoer. Die kenners het nou
soos volg voorgestel:
a. Ons het geen ander keuse as om voort te gaan met die aansoek by die
SAID (Vrystellingskomponent) om belastingvrystelling nie. Dit geld
natuurlik vir die liefdadigheidsbeen.(Volkshulp 2000)
b. Die ander been van die organisasie, naamlik die handeldrywende
gedeelte (Snuffelwinkels) is dan die belastingpligtige entiteit. Die
SAID beskou alle omsette van geskenkte items as "wins" waarop belasting
– en gepaardgaande BTW – betaalbaar is.
c. In die lig van die voorgaande moet die bestaande Grondwet van
Volkshulp 2000 aangepas word om aanvaarbaar te kan wees vir veranderde
Inkomstewet veranderinge. (Selfs so onlangs as April 2006). Hiervoor is
'n konsultant se dienste verkry om die aanpassings/wysigings bespreek.
Die implikasie hiervan is dat hierdie Grondwetwysiging afsonderlik aan
'n Spesiale Vergadering voorgelê sal moet word vir goedkeuring. Na
verwagting so vroeg as Julie 2006. Hiervoor sal lede weer opgeroep moet
word.
d. Dit wil voorkom asof net een Artikel 21 maatskappy gestig kan word en
dat die twee bene (liefdadigheid en handelsgedeelte) rekenkundig los van
mekaar gehou kan word. Dit sal dan vir Volkshulp 2000 die ruimte skep om
voort te gaan met die aansoek om belastingvrystelling ingevolge die
Artikel 18a klousule. |
|
Opgedateer: 5 Mei 2008
LW.
Hierdie inligting is deel van Volkshulp 2000 se argief van werksaamhede gedurende die tydperk 1 Maart
2005 tot 28 Februarie 2006
