|
Ons kan met trots sê: Ons beskik oor 'n pragtige ouetehuis vir
selfversorgende bejaardes. Volledig, huislik, aangenaam met volop
fasiliteite. Geen sent verskuldig op die eiendom nie, met die
uitsondering van lopende munisipale dienstegelde en die normale ander
uitgawes. Weens die afsterwe van twee manlike inwoners en twee troues
waar die paartjies elders gaan woon het, is daar tans slegs twee
inwoners in die Volkshulpsentrum. Nou is dit so dat die vraag gevra word
waarom ons nie die maksimum van 24 inwoners inneem nie. Die antwoord is
eenvoudig: Ons beskik nie oor die fondse om aan inwoners maaltye voor te
sit sonder genoegsame fondse nie. Dit kos in die orde van sowat R2 000
per persoon per maand. Dit dien geen doel om senior burgers in te neem
en dan skiet die voedselvoorsiening te kort nie. Hierdie is maar een van
die pogings van ons kant om die vele en wye maatskaplike probleme aan te
spreek. Indien die volle welsynspektrum gedek wil word, moet daar maar
net 'n veel groter begroting kan wees waarmee gewerk kan word. Welsyn is
omtrent sinoniem met uitgawes. Dit kos eenvoudig baie geld om die
verskillende welsynsterreine te kan aanspreek. Sonder staatshulp is die
ondervanging hiervan 'n saak van onmoontlikheid.
In ons geval is daar slegs een oplossing, naamlik, dat borge bekom
moet word sodat elke inwoner wat ingeneem word, verseker kan wees van 'n
menswaardige bestaan en nie die van 'n plakkeromstandigheid nie. In
hierdie verband word veral die APK-gemeentes genader om sulke
verbintenisse (borgskappe) van
R2 000 per maand per inwoner gevestig te kry. Net die tyd sal leer
hoe suksesvol hierdie poging sal wees. Al wat ons graag sal wil sien, is
dat die Volkshulpsentrum voltallig sal wees; dat elke inwoner vir die
res van sy/haar lewe gelukkig en harmonieus, binne normale huislike
omstandighede, sal kan lewe en les bes, dat elke inwoner steeds 'n hele
klompie honderd rand per maand tot sy/haar beskikking het, om hulself
bietjie te bederf en daardie iets ekstra elke maand te kan aanskaf.
- Uitgawes betrokke by die Volkshulpsentrum
Uitgawes betrokke by die Volkshulpsentrum het die afgelope jaar
R95 840 beloop. Hiervan het maaltye R40 320 bedra. Hierdie syfer behoort
veel hoër te wees, maar danksy die konserwatiewe hantering van
kruideniersaankope, ens, word hierdie uitgawe beperk tot dit wat
bekostigbaar is. Net een ekstra inwoner sou hierdie uitgawe tot minstens
R64 320 opgestoot het.
Elke inwoner dra wel 'n gedeelte tot hul losies by. Gedurende die
afgelope jaar is R24 480.10 in hierdie opsig ontvang. Daar was aan die
begin van 2005 nog 5 inwoners. Maatskaplike pensioenarisse (met geen
ander inkomste) betaal maandeliks net R300 vir volle losies. Die totale
uitgawes aan die Volkshulpsentrum het die afgelope jaar R95 840 bedra.
Die detail hiervan is beskikbaar en kan net aangevra word.
Nog foto's van die
Volkshulpsentrum |
Opgedateer: 5 Mei 2008
LW.
Hierdie inligting is deel van Volkshulp 2000 se argief van werksaamhede gedurende die tydperk 1 Maart
2005 tot 28 Februarie 2006
