| |
Volkshulp 2000 het enkele jare gelede met baie goeie bedoelings
betrokke geraak by die daarstelling van 'n noodhuisvestingsprojek.
Genoegsame kapitaal om 'n behoorlike, moderne sentrum daar te stel, was
daar eenvoudig nie. Nogtans het die behoeftes vir huisvesting, gegewe
die steeds toenemende plakkerskampe, ons genoodsaak om die sogenaamde
kwantumsprong te gee. Oë toeknyp, vertrouend op die Heer, het ons die
sprong gewaag. Vandag kan ons terugkyk en die Vader se genade gadeslaan.
Die Volkshulptuiste (VHT) is nog nie naastenby die ideale nie, maar wel
'n plek waar nooddruftige volksgenote nie net 'n werk/inkomste en 'n dak
oor die kop gebied word nie, maar waar daar ook liefde en 'n geestelike
opvoeding tesame met die maatskaplike opheffing en rehabilitasie
geskied. 'n Soort "deurgangshuis" waarna die persoon weer 'n
menswaardige en volwaardige plek in die ekonomies-bedrywige samelewing
kan inneem .
Ongelukkig word steeds na die Volkshulptuiste deur sommiges (moontlik
uit onkunde van wat presies by die VHT vermag word) verwys as die
"mission", wat die VHT beslis nie is nie. Sy doel, samestelling en
werksaamhede getuig van die teenoorgestelde. Dis die enkele
rehabilitasie-suksesverhaal wat almal wat betrokke is by die VHT,
daardie stukrag, ywer en motivering verskaf om, ten spyte van
teenkanting van veral diegene met min empatie vir diegene wat in die
lewe geval het, voort te gaan om die hand te reik na daardie platgeslane
volksgenote wat om hulp uitroep. Ons wil dit onomwonde stel, dat
Volkshulp 2000 absoluut verbind is tot die sukses van die
opheffingstaak, waarvoor ons voorwaar ons bereid verklaar het. Daar is
geen manier dat ons ons van koers sal laat dwing deur persone wat nie
soveel empatie het met die Bybelse opdrag om na die weduwees en wese om
te sien nie.
- Geestelike bearbeiding deur NG-gemeente, Cullinan
Die opheffingsdiens waarvan melding gemaak is, behels sommer heelwat
fasette. Eerstens en heel boaan die lys staan geestelike bearbeiding.
Sonder die geestelike sy is opheffing nie moontlik nie en futiel. Dank
is dan ook verskuldig aan die NG-gemeente, Cullinan, met ds. Okkie
Olivier aan die spits, wat die taak en leiding op hom geneem het om
tesame met sy kerkraad en maatskaplike werksters, hierdie omvangryke
taak by die VHT te onderneem. Sondae se eredienste vervul 'n prominente
rol. So ook die gereelde weeklikse bidure wat deur Geesgedrewe vriende
in die omgewing behartig word.
- Suksesse in die rehabilitasieproses
Wanneer mens van suksesse in die rehabilitasieproses praat is dit ook
nie asof aanspraak op 'n 100% suksesverhaal gemaak kan word nie. Die
getal permanente suksesse kan seker die tweesyferperk haal en is maar
weinig. Nogtans is ons jubelend oor daardie enkele gevalle. Dit help tog
nie mens is naïef en gaan van die standpunt uit dat elkeen wat na 'n
periode by die VHT "skoon" uitgaan, wel permanent genees is nie. Nogtans
bly ons baie optimisties en weet dat die Here hierdie grootse projek ook
onder Sy vleuels hou. Ons beloning is wanneer iemand na 'n periode in
die VHT as "deurgangshuis", weer kan terugkeer na 'n selfstandige
bestaan met 'n werk en eie verblyf in die openbare sektor.
Ons is dankbaar om tans oor die dienste van iemand wat nie net
naby die VHT woonagtig is nie, maar ook oor die nodige kwaliteite beskik
en dit toepas, om die gestelde doelwitte met die rehabilitering van
persone behulpsaam te wees. Ongelukkig was die Beheerbeampte (Jan Horn)
self by 'n traumatiese kapingsproses betrokke. Ook hierdie voorval het
vir Volkshulp 2000 heelwat gekos. In die proses is sowat R6 000 tesame
met belangrike hersteltoerusting, rekenkundige boeke ens. saam met die
bakkie gesteel. Laasgenoemde is wel teruggevind, maar die res was
spoorloos. Ook hierdie saak is nog onopgelos en niemand in hegtenis
geneem nie.
Een groot vrees hierdie tyd van die jaar veral, is brande. Die VHT is
grootliks gerat, want sou 'n vuur buite beheer ons tref, is ons onderdak
daarmee heen. Daarom het ons o.a. 'n goeie tweedehandse trekker
aangeskaf vir die maak van brandbane. Sover is ons wonderlik gespaar van
verwoestende veldbrande en ook skade.
 Melding moet ook gemaak word van ander pragtige
meewerkers soos die dames van gebedsgroepe wat weekliks kruideniersware
by die VHT aflewer, en by verlede Desember selfs 'n Kersfunksie vir die
inwoners gereël het. So 'n bietjie "bederf" met gepaardgaande
Kersgeskenkies. Voorwaar vriende wat die nood van andere raaksien en
bereid is om iets daaraan te doen. Barmhartige Samaritane. Hierby kan
gevoeg word daardie inwoners wat hul harte en hande oopmaak en op
tasbare wyse hul empatie en bereidwilligheid om te help, betoon.
|
|
Opgedateer: 5 Mei 2008
LW.
Hierdie inligting is deel van Volkshulp 2000 se argief van werksaamhede gedurende die tydperk 1 Maart
2005 tot 28 Februarie 2006
